নাং-ফা পঢ়াৰ অনুভৱ : Historical Novel [Book Summary]

     "নাং-ফা" এখন বুৰঞ্জীমূলক উপন্যাস। এই উপন্যাসখনৰ লেখিকা জুৰী বৰা বৰগোহাঞি। নাং-ফা এটা তাই শব্দ। ইয়াৰ অৰ্থ ৰাজকুমাৰী। উপন্যাসখন অসমৰ সতী জয়মতীৰ ওপৰত আধাৰিত। জয়মতীক লৈ এতিয়ালৈকে বিভিন্ন লেখা প্ৰকাশ পাইছে। কিন্তু "নাং-ফা" এখন জীৱন্ত দলিল। লেখিকাই এই উপন্যাসখনৰ জৰিয়তে জয়মতী সন্দৰ্ভত চলি থকা কিংবদন্তী, লোককথা তথা বিতৰ্কবোৰ চালিজাৰি চাই এখন গৱেষণামূলক উপন্যাস সৃষ্টি কৰিবলৈ সক্ষম হৈছে।

"নাং-ফা" ৰ সৃষ্টি

       বিবাহসূত্ৰে মেছাগড়ৰ বোৱাৰী হোৱা লেখিকাই ইতিহাস প্ৰসিদ্ধ ঠাই, জয়মতীৰ জন্মস্থান মাদুৰি চহৰৰ প্ৰতি আকৰ্ষিত হৈছিল। জয়মতীৰ পৰিয়ালবৰ্গৰ সৈতে কথা হোৱাৰ পাছত তেওঁ এখন বুৰঞ্জীমূলক উপন্যাস লিখাৰ সিদ্ধান্ত লৈছিল। বিভিন্ন তথ্য, কিংবদন্তী আৰু লোককথাৰ সমাহাৰত সৃষ্টি হৈছিল "নাং-ফা"।

Assamese Book Summary : নাং-ফা

নাং-ফা পঢ়াৰ অনুভৱ

      "নাং-ফা" এখন ঐতিহাসিক সমলেৰে স্বকীয় আঙ্গিকতা বজাই ৰখা সফল উপন্যাস। সতী জয়মতীৰ ল'ৰালি কাল, বিবাহ, দাম্পত্য জীৱন, আহোম ৰাজবংশ আদি সকলোৰে বৰ্ণনা এই উপন্যাসখনত খুউব সুন্দৰকৈ কৰা হৈছে। উপন্যাসখনৰ ভাষা অতি সাৱলীল আৰু আকৰ্ষণীয়। উপন্যাসখন পঢ়ি এনে লাগিল যেন সঁচাই তেজ মঙহৰ জয়মতীকহে কাষত পাইছোঁ। লাইথেপেনা সলাল গোহাঁইৰ জিয়াৰী সামাজিক দিশৰ লগতে ৰাজনীতি দিশতো বুদ্ধিমতী আৰু পাৰ্গত আছিল। নিজৰ দেশৰ কাৰণে প্ৰাণ আহুতি দিবলৈ জয়মতীয়ে যে এটা সুন্দৰ ঘৰুৱা পৰিবেশ পাইছিল সেই কথা উপন্যাসখনৰ জৰিয়তে গম পোৱা যায়।


      লেখিকাই পাদটীকাত উল্লেখ কৰিছে যে জয়মতীৰ শেষ শয়ন ক'ত হ'ল সেই সম্পৰ্কে ক'তো তথ্য পোৱা নাযায়। কিন্তু মেছাগড় আৰু মাদুৰিৰ কেইবাজনো মানুহে জয়মতীৰ পৰিয়ালৰ লোকৰ পৰা শুনিছিল যে জেৰেঙা পথাৰত মৃত্যু হোৱা জয়মতীৰ মৃতদেহ লোকনিন্দাৰ ভয়ত লালুকসোলাই পিতনিত কৰবাত ভৰাই থৈ দিলে যিডোখৰ ঠাইৰ বিষয়ে সকলো অজ্ঞাত। পিছত জয়মতীৰ শটো নাপাই লাই-লেচায়ে খেৰেৰে জুমুঠি পুৰিহে জয়দৌল সজায়। এই বিষয়ত আলোচনাৰ থল নিঃসন্দেহে আছে বুলি তেওঁ উল্লেখ কৰিছে। ইয়াৰোপৰি তেওঁ উল্লেখ কৰিছে যে গদাপাণিয়ে চাওফা হৈ জয়মতীক শাস্তি দিয়া মানুহকেইটাৰ অপৰাধ বিচাৰ কৰিলেনে নে সহজে এৰি দিলে সেই সম্পৰ্কে বুৰঞ্জীত ক'তো উল্লেখ নাই। লেখিকাই জয়মতীৰ ককায়েক নুমলি বৰগোহাঁইৰ আজুনাতি বুৰঞ্জীবিদ স্বৰ্গীয় মানিক বৰগোহাঁইৰ পুত্ৰ সুকৃতি বৰগোহাঁইৰ পৰা শুনিছিল যে গদাধৰে চাওফা হৈ জয়মতীক শাস্তি দিয়া মানুহখিনিক বিচাৰি আনি নিজৰ মনৰ জোখাৰে শাস্তি দিছিল। গিদাগাঁঠি হাজৰিকা আৰু চাউদাংকেইটাৰ শৰীৰ কাটি কাটি নিমখ ভৰাই মাৰিছিল। লালুকসোলাক হত্যা কৰিছিল। জয়মতীৰ শাস্তিৰ ষড়যন্ত্ৰত জড়িত সকলোকে কাটি মাৰিহে সুখ পাইছিল।


          প্ৰেম, সাহস, ধৈৰ্য আৰু ত্যাগৰ আন এক নাম সতী জয়মতী। নিজৰ স্বামীৰ জীৱন ৰক্ষা কৰিবলৈ, দেশক ৰক্ষা কৰিবলৈ জয়মতীয়ে কৰা ত্যাগ ইতিহাসৰ পাতত সোণালী আখৰেৰে লিপিবদ্ধ হৈ ৰ'ব। অসমীয়া সাহিত্য সমৃদ্ধ কৰিব পৰাকৈ নাং-ফা এখন উল্লেখনীয় গ্ৰন্থ। লেখিকাই জয়মতীক যি ৰূপত পাঠকৰ ওচৰত ডাঙি ধৰিছে সেয়া সঁচাই প্ৰশংসনীয়।


উপন্যাসখনত উল্লেখ থকা কেইটামান তাই শব্দ -

১/নাং-ফা - ৰাজকুমাৰী (নাং=তিৰী, ফা=দেৱ/দেৱী)

২/চাওফা - স্বৰ্গদেউ

৩/নাং তেক্ বক খন- অকুমাৰী ছোৱালীৰ পুষ্পিতা পালন

৪/লুকলাও - আহোমৰ সাজপানী

৫/বৰচামান - ইন্দ্ৰ দেৱতা

৬/প্লাউ - বোৱাৰী

৭/মে'চাও - শাহু

৮/পি-চাও - জেশাহু

৯/পা-বি বাও- বায়েক

১০/ফেলুঙ - আহোম সকলৰ ধৰ্মপুথি

১১/ঞি - নগা লোকে পিন্ধা কাপোৰ

১২/পংৱাবটেকচাই - মহামান্য ৰাজঅতিথি


✍️দুলুমণি গগৈ

ডিব্ৰুগড়, মৰাণ

Post a Comment

0 Comments
* Please Don't Spam Here. All the Comments are Reviewed by Admin.

Top Post Ad

Below Post Ad

DOWNLOAD ASSAMESE GK APP DOWNLOAD
GK IN ASSAMESE LANGUAGE
Join Our Telegram Channel ইয়াত ক্লিক কৰক
Like our Facebook Page ইয়াত ক্লিক কৰক
Disclaimer: সকলো তথ্য বিভিন্ন উৎসৰ পৰা সংগ্ৰহ কৰা হৈছে। কেতিয়াবা যিকোনো ত্ৰুটি দেখা যাব পাৰে, সেই পৰিস্থিতিত আমাক কমেন্ট কৰি জনাবলৈ অনুৰোধ জনোৱা হল। লগতে, আমি (www.assamesegk.info), ইয়াত প্ৰদান কৰা যিকোনো তথ্যৰ ওপৰত কোনো আইনী দায়িত্ব নলও। ইয়াত, সকলো তথ্য কোনো আইনী ব্যৱহাৰ অবিহনে শিক্ষাৰ উদ্দেশ্যে প্ৰদান কৰা হৈছে।